प्रणय दिवसको अबसर पारेर चितवनमा नवौँ सौराहा फुड फेस्टिभल हुने

काठमाडौँ । चितवन जिल्लाको सौराहामा आगामी फागुन १, २, ३ र ४ गते नवौँ फुड फेस्टिवल हुने भएको छ । रेस्टुरेन्ट एन्ड बार एसोसिएसन नेपाल सौराहा (रेवान)ले आज यहाँ पत्रकारसम्मेलनको आयोजना गरी आन्तरिक पर्यटनको प्रवद्र्धन गर्ने उद्देश्यका साथ उक्त फेस्टिभल गर्न लागिएको जानकारी दिएको हो ।

फेस्टिभलका संयोजक शीरलाल परियारले प्रत्येक वर्ष प्रणय दिवसलाई नै लक्ष गरी फेस्टिभलको आयोजना गर्दै आइरहेको र यसपटक रत्ननगर नगरपालिका–१८ स्थित हात्तीचोकमा रहेको खुल्ला मैदानमा ७० देखि ८० स्टल रहने बताउनुभयो ।

महोत्सवमा स्वदेशी र विदेशी खानाको प्रवद्र्धन गरिने, स्थानीय महिला क्लब, पिछडिएको वर्गको सामूहिक रुपमा स्थानीय परिकार तथा खानाको प्रदर्शनी गरिने बताइयो । महोत्सवमा दैनिक १० देखि १५ हजारसम्मले अवलोकन गर्ने लक्ष्य आयोजकको रहेको छ ।

कार्यक्रममा राष्ट्रियस्तरका लोकदोहोरी कलाकार पशुपति शर्मा, मिलन लामा, रामजी खाँड, चन्द्र शर्मा, मैनारेश्मी मगर, शान्तिश्री परियार, कृष्णा गुरुङ्, सृष्टि विष्टलगायतले आफ्नो प्रस्तुति दिनेछन् भने स्थानीय नृत्यसमेत देखाइनेछ ।